Descrição
Institutu Fransés di kau Berdi ta prumovi lansamentu di «Largo Winch – Arderu vulumi1)» na verson kauberdianu, traduson di Nicolas Quint ku Aires Semedo na diâ 11 di Máiu, Sésta-fêra, 18h30 na Biblioteka Nasional.
Nerio Winch é un di kes ómi más riku ki ten na mundu, sim-el é xefri di Grupu W, más grándi konjuntu di npréza ki ti oxi nungen ka kustuma riuni ki fari mánda n-el el-só. Na ta móri, Nerio, ki ka txiga di pari, ta dexa tudu si rikésa na mó di Largo, si uniku arderu, un jóvi di vinti-sax ánu d’idádi k-e purfidjába mininu kántu k-e atxába-el órfu na Juguslávia. Má na óra di mórti di Nerio, a-li Largo sta prézu na un kadiâ di Turkiâ, trokádu un krimi k-e ka kumeti. Tirmódi Largo é rapás ki nasi pa luta: ku djuda di ses amigu e ta konsigi sáfra p-e bá kumánda kel mundu di dés bilion di dóla ki Nerio dexâ-l p-e erda...«Largo Winch» é frutu di trabadju di JEAN VAN HAMME e PHILIPPE FRANCQ. Hamme nasi na 1939, na Bruxélas (Béljika). E skrebi stória di txeu koleson di Bánda Dizenhádu, sima “Thorgal” (ku dizenhu di Rosinski), “Largo Winch” (un stória baziádu na si própi rumánsi, ku dizenhu di Francq), “XIII” (ku dizenhu di William Vance). Na 2001, ses libru di Largo Winch ben fasedu filmi ku el. Francq nasi na 1961, na Etterbeek (Béljika). Na désdi si mininésa, é dodu na lé Bánda Dizenhádu. Na 1988, e kontra ku Van Hamme, ki kontâ-l si prujétu di stória di Largo Winch. Librus di Largo Winch pása ta bendi ton txeu ki Francq fika ta trabádja ti gósi só na kel un stória: kada ánu, e ta purbika un nóbu bentura di si eroi.
Nicolas quint djuntu ku Aires Semedo ta konbida tudu algem pa bem konxi stória di Largo Winch – Arderu, Sen rása, sen djerason, diskutidor, mudjeréngu, bágu, matxikádu, freneti: ku vinti-sax ánu d’idádi, ku un mundu di dés bilion di dóla ta sperâ-l p-e bá kumánda…Libru skrebédu na língua di nos terra kiriolu, idison di editora Polvo, di 48 páji purbikádu ku djuda di Union Latinu.